धनगढी – सुदूरपश्चिम प्रदेशका पूर्वमन्त्री रमेश धामीले पुष्पकमल दाहाल ‘प्रचण्ड’ प्रधानमन्त्री भएका बेलामा जेल जाने अवस्था आएपछि काङ्ग्रेस-एमालेहरु एक भएको बताएका छन् ।
सुदूरपश्चिमका पूर्व पर्यटन वन तथा वातावरण मन्त्री धामीले धनगढीको कैलाली बहुमुखी क्याम्पसमा आयोजित वृक्षारोपण कार्यक्रममा बोल्दै यस्तो भनेका हुन् ।
“एमाले काङ्ग्रेसकै ठूलठूला मान्छेहरु प्रचण्ड प्रधानमन्त्री भएका बेलामा जेल जाने अवस्था आइसकेपछि काङ्ग्रेस-एमालेहरुले अब प्रधानमन्त्री प्रचण्डलाई हामी स्विकार्न सक्दैनौं भन्ने निष्कर्षसहित उहाँहरुले एक ठाउँमा हुनुहुन्छ ।” पूर्वमन्त्री धामीले भने, “र धेरै दिन टिक्दैन । हामी कामना गरौं यिनले धेरै दिन टिक्नुपर्छ । ८४ मा यिनिहरु मिलेर चुनाव लड्नुपर्छ ।”
पूर्वमन्त्री धामीले अहिलेको सत्ता समीकरण भ्रष्टाचारको संरक्षण गर्न भएको बताएका छन् ।
उनले भने, “भ्रष्टाचारका संरक्षकहरु भ्रष्टाचारका पक्षपोषकहरु एक ठाउँमा हुन जरुरी छ । यो देशमा सबैभन्दा ठूलो शत्रु भनेको भ्रष्टाचार हो ।”
क्याम्पसमा आज अखिल(क्रान्तिकारी) धनगढी इकाईका अध्यक्ष तथा केएमसीका विद्यार्थी पवन सुनारको जन्मदिनमा वृक्षारोपण तथा सरसफाई कार्यक्रम गरिएको थियो ।
