धनगढी – सुदूरपश्चिममा आज रानाथारु समुदायले तीज पर्व मनाइरहेका छन् ।
कञ्चनपुर र कैलालीमा बसोबास गर्दै आएका रानाथारु समुदायका महिलाहरूले श्रावण शुक्ल पक्षको तृतीया तिथिका दिन आफ्ना दाजुभाइ र भतिजाहरूको उन्नति, प्रगति र दीर्घायुको कामना गर्दै पानी समेत नपिएर निराहार व्रत बस्ने गर्दछन् ।
तीजको दिन प्रसादका रूपमा परम्परागत पकवान सिमही, पपरा, पुरी बनाउने चलन रहेको छ । व्रतालु महिलाहरुले नदी तथा तलाउ किनारमा कुश वा काँसको झुड्की बाँध्दै पूजाआजा गरी पकवान चढाउने गर्दछन् ।
त्यसलगत्तै नदी तथा तलाउमा झुड्की बगाई आफ्ना दाजुभाइ तथा भतिजाहरू र सपरिवारको उन्नति, प्रगति र दीर्घायुको कामना गर्ने गर्दछन् ।
रानाथारु समुदायले हरेक वर्ष असार शुक्ल पूर्णीमादेखि गाउँका सबैलाई पायक पर्ने ठाउँमा सावनको डोला अर्थात् पिङ राखेर खेल्ने गर्छन ।
उक्त समुदायले तीजलाई दिदीबहिनी र दाजुभाइको आत्मीयता बढाउने महत्त्वपूर्ण पर्वका रूपमा लिने गर्दछन् । यसै अवसरका आज बुधबार कञ्चनपुर र कैलालीका केही स्थानीय तहहरुले स्थानीय विदा समेत दिएका छन् ।
