काठमाडौं । बालरोग विशेषज्ञ एवम् साहित्यकार डा. नवराज केसीको दोस्रो गैरआख्यान कृति ‘स्वस्पर्श’ काठमाडौंमा लोकार्पण गरिएको छ ।
नेपाल प्रज्ञा–प्रतिष्ठानको डबलीमा आयोजित कार्यक्रममा वरिष्ठ मुटुरोग विशेषज्ञ डा. भगवान कोइराला, आख्यानकार एवम् प्राज्ञ अमर न्यौपाने र लेखक डा. नवराज केसीले संयुक्त रूपमा पुस्तक सार्वजनिक गरेका हुन् ।
कार्यक्रममा बोल्दै आख्यानकार अमर न्यौपानेले ‘स्वस्पर्श’ पुस्तकलाई मानिसको मनोवैज्ञानिक उपचारका लागि ओखतीका रूपमा प्रस्तुत भएको बताए । उनका अनुसार, यो पुस्तक केवल प्रेरणादायी मात्र नभई प्रत्येक मानिसले पढ्नुपर्ने कृति हो ।
यस्तै, वरिष्ठ मुटुरोग विशेषज्ञ डा. भगवान कोइरालाले पुस्तक सबै पुस्ताका लागि उपयोगी भएको टिप्पणी गरेका छन् । उनले भने, “साहित्यिक पुस्तक पढ्ने समय प्रायः पाइँदैन, तर ‘स्वस्पर्श’ मैले अध्ययन गरें । मलाई यो कृति असाध्यै उपयोगी लाग्यो । विशेषगरी बालबालिका र बिरामीहरूका लागि अझ प्रेरणादायी छ । हामीले बनाइरहेको काठमाडौं इन्स्टिच्युट अफ चाइल्ड हेल्थ (किओच) मा पनि यो पुस्तक राख्ने योजना छ ।”
लेखक स्वयं डा. नवराज केसीले ‘स्वस्पर्श’लाई आशा, प्रेरणा र खुसीका कथा समेटिएको कृति बताए । उनले भने, “जीवनमा मैले धेरै पुस्तक पढें, तर समाजलाई प्रत्यक्ष उपयोग हुने पुस्तक दिने उद्देश्यले आफ्नै जन्मस्थान कर्णालीका कथा लेखें । ‘स्वस्पर्श’ हरेक मानिसको आफ्नै संघर्ष र आत्मयात्राको अभिलेख हो ।”
