काठमाण्डौं : गण्डकी प्रदेशका यातायात व्यवसायीले सार्वजनिक यतायात ठप्प पारेका छन्।
प्रदेश सरकारले ‘राइड सेयरिङ’लाई मान्यता दिने कानून ल्याएपछि यातायात व्यवसायीले गण्डकीमा अनिश्चितकालीन सार्वजनिक यतायात सेवा ठप्प पारेका हुन्।
नेपाल यातायात व्यवसायी राष्ट्रिय महासंघको नेतृत्वमा व्यवसायीले राइड सेयरिङलाई मान्यता दिने निर्णयबाट पछि हट्न प्रदेश सरकारलाई दबाब दिन यातायात ठप्प पारेका हुन् । सार्वजनिक यातायात सेवालाई धराशायी बनाउने उद्देश्यमा सरकार लागेको महासंघका वरिष्ठ उपाध्यक्ष सरोज सिटौलाले आरोप लगाए। व्यवसायीले आफ्नो निर्णयबाट पछि हट्न सरकारलाई १८ गतेसम्मको अल्टिमेटम दिएका छन् ।
सरकार निर्णयबाट पछि नहटे १९ गतेदेखि देशव्यापी यातायात सेवा ठप्प पार्ने व्यवसायीको चेतावनी छ । दबावस्वरुप व्यवसायीले भोलि काठमाडौंमा विरोध प्रर्दशनको आयोजना गरेका छन् । प्रदेशभर करिब गुड्ने करिब १५ हजार भन्दा बढी सार्वजनिक गाडीहरु रहेको तथ्यांक छ । यातायात ठप्प भएसँगै सर्वसाधारण भने मर्कामा परेका छन् । सार्वजनिक सवारी नचल्दा पोखराका सडक बिहानैदेखि सुनसान छन् ।
