धनगढी – जयबहादुर कठायत, धनगढीका एक वृद्ध, मुक्तिनाथकाे उकालाेमा ब्याग सम्हाल्दै हिड्दै थिए। उनको अनुहारमा उत्साह र आश्चर्य मिश्रित भाव थियो। “मेरो जिन्दगीमा मैले कहिल्यै सोचेको थिइनँ कि मुक्तिनाथको दर्शन गर्न पाउनेछु,” उनले भने, “यो सब मेयर गोपाल हमालको कृपाले सम्भव भयो। उनको जय होस्, मुक्तिनाथ बाबाले उनलाई सधैं रक्षा गरुन्।” उनको यो भनाइमा अन्यले पनि सहमति जनाए।
धनगढी-३ का नन्दलाल आचार्य, ८४ वर्षको उमेरमा पनि जोशले भरिएका थिए। उनको अनुहारमा समयले कोरेका रेखाहरूले उनको जीवनको गहिराइ बोल्थे, उनको आँखामा चमक थियो—यो यात्राको उत्साहको चमक। “मलाई लाग्दैनथ्यो कि यो उमेरमा यस्तो ठूलो यात्रा गर्न सकिन्छ,” नन्दलालले मुस्कुराउँदै भने, “धनगढी उपमहानगरपालिकाले हामीलाई यो अवसर दियो। गोपाल हमालको यो काम सधैं यादगार रहनेछ। यो यात्रा मेरो जीवनको सबैभन्दा अमूल्य सम्झना बन्नेछ। जय होस् धनगढीको, जय होस् मेयर हमालको!”
हिमालको काखमा अवस्थित मुक्तिनाथ मन्दिरको दर्शन गर्न पाउनु सबैका लागी आध्यात्मिक सौभाग्य हाे।
धनगढी-३ कै जयबहादुर थापा मन्दिरको प्रवेशद्वारमा पुग्दा भावुक भए। उनले हात जोडेर मुक्तिनाथ बाबालाई प्रणाम गरे र भने, “मेयर साहबले हामीलाई यो पवित्र दर्शनको अवसर दिए। उनको यो उपकार हामी कहिल्यै बिर्सने छैनौं। जय होस् मुक्तिनाथ बाबाको, जय होस् मेयर हमालको!”
“हाम्रो मेयरले हामीलाई केवल यात्रा मात्र गराएनन्, उनले हामीलाई सम्मान र माया पनि दिए,” एक वृद्धाले भनिन्, “यो उमेरमा यस्तो सुख र आनन्द पाउनु भनेको साँच्चिकै ठूलो कुरा हो।”
मुक्तिनाथको दर्शनपछि जब टोली फर्कन थाल्यो, सबैको मनमा मिश्रित भावना थियो। एकातिर मुक्तिनाथ बाबाको दर्शनको आनन्द, अर्कोतिर धनगढी फर्कने उत्साह। तर सबैको मनमा एउटै कुरा थियो—मेयर गोपाल हमालप्रति गहिरो कृतज्ञता। बसहरूमा फेरि पनि उनको नाम गुञ्जिरह्यो। कसैले उनको दीर्घायुको कामना गरे, कसैले उनको यो कार्यको प्रशंसा गरे।
“मेयर सापलाई धन्यवाद छ हामिलाई यो अवसर जुराइदिनु भयो”, धनगढी ११ का राममताे रानाले भने।
यो तीर्थयात्रा केवल एक धार्मिक यात्रा मात्र हाेइन, यो मेयर गोपाल हमालको जनताप्रतिको समर्पण हो। धनगढीमा उनको निर्वाचनपछि, उनले सहरका वृद्धवृद्धाहरूलाई सम्मान र स्नेह दिने योजनाहरू बनाए। आर्थिक वर्ष २०७९-०८० देखि सुरु भएको यो तीर्थयात्रा कार्यक्रम हरेक वर्ष चल्छ। हमालको यो पहलले धनगढीका बुढापाकाहरूलाई नयाँ जीवनको अनुभव दिएको छ।
