धनकुटा : धनकुटामा आगामी वैशाख ५ गतेदेखि २० गतेसम्म भलिबल उत्सव हुने भएको छ।
जिल्ला भलिबल संघ धनकुटाले बुधबार पत्रकार सम्मेलनको आयोजना गरि भलिबल उत्सव हुने जानकारी दिएको हो।
धनकुटा नगरपालिका-५, स्थित तल्लो टुँडिखेलमा हुने उत्सवमा स्थानीय उत्पादन तथा सांस्कृतिक कार्यक्रमको प्रदर्शनी रहने आयोजकले जनाएको छ। भलिबल उत्सवमा वडा स्तरीय पुरुष भलिबल र स्थानीय तह स्तरीय महिला भलिबल प्रतियोगिता हुने भएको छ।
वडास्तरीय पुरुष भलिबलमा ६० वटै वडाका टीम र पालिका स्तरीय महिला भलिबलमा धनकुटाका ७ वटै स्थानीय तहका टीमको सहभागिता रहने जिल्ला भलिबल संघ धनकुटाका अध्यक्ष गौरव कार्कीले जानकारी दिए।
खेलाडी उत्पादन गर्ने, खेलाडी छनोट गर्ने, यहाँका कला संस्कृति जगेर्ना र प्रदर्शन गर्ने उद्देश्यका भलिबल उत्सव गर्न लागिएको आयोजकले जनाएको छ। पछिल्लो समय धनकुटामा धेरै भलिबलका प्रतियोगिता भए पनि खेलाडी उत्पादन नभएका कारण उत्सव गर्न लागिएको आयोजकले जनाएको छ।
भलिबल उत्सव पछि वडास्तरबाट खेलाडी छनोट गरिने र खेलाडीलाई बन्द प्रशिक्षणमा राखिने बताइएको छ। यस्तै उत्सवपछि स्थानीय कला संस्कृति जगेर्ना गर्ने, धनकुटामा भएका स्थानीय उत्पादित वस्तु प्रदर्शन तथा बिक्री गरिने र लोप हुँदै गएका स्थानीय पञ्जेबाजा लगायतका लोपोन्मुख बाजाको संरक्षण हुने आयोजकले जनाएको छ।
