धनगढी –कैलाली बहुमुखी क्याम्पसमा दशैं विशेष बृहत सांस्कृतिक कार्यक्रमको आयोजना गरिएको छ।
सोमबार केएमसी म्युजिक क्लबद्वारा उक्त बृहत सांस्कृतिक कार्यक्रम गरिएको हो।
कार्यक्रममा दशैं दिपावलीको शुभकामना आदानप्रदान तथा नृत्य संगीत गजल मुक्त प्रस्तुत गरिएको छ।
यस्तै कार्यक्रममा पूर्व पदाधिकारीहरूलाई सम्मान गरिएको छ भने अन्य विभिन्न व्यक्तिहरूलाई सम्मान तथा मायाको चिनो प्रदान गरिएको छ।
कैलाली बहुमुखी क्याम्पसका क्याम्पस प्रमुख तोयराज भट्टको प्रमुख आतिथ्यता रहेको उक्त कार्यक्रममा केएमसी म्युजिक क्लबकी अध्यक्ष अनिता धामीको अध्यक्षता रहेको थियो।
यस्तै कार्यक्रममा क्याम्पसमा अध्यापनरत प्राध्यापकहरू स्ववियु अध्यक्ष यमराज जोशी, विभिन्न संगठनका विद्यार्थी नेताहरू र क्याम्पसमा अध्ययनरत विद्यार्थीहरूको उपस्थिति रहेको थियो।
केएमसी म्युजिक क्लबले कैलाली बहुमुखी क्याम्पसमा विभिन्न प्रतिभाहरू प्रस्फोटन गर्ने कार्य गरिरहेको कार्यक्रमका प्रमुख अतिथि तथा क्याम्पस प्रमुख तोयराज भट्टले बताएका छन्।
यस्तै केएमसी म्युजिक क्लबले विगतमा विभिन्न राष्ट्रिय कलाकारहरू बोलाएर कार्यक्रम गराउँदै आइरहेको र यस वर्ष भने स्थानीय प्रतिभालाई जोड दिइएको क्लबकी अध्यक्ष अनिता धामीले बताएकी छन्।
विभिन्न व्यक्तिमा भएको प्रतिभा प्रस्फोटन गर्ने र आफ्नो कला संस्कृतिलाई जोगाउने उद्देश्यले उक्त कार्यक्रमको आयोजना गरिएको अध्यक्ष धामीले बताइन्।
