धनगढी –डडेल्धुराको भागेश्वर गाउँपालिका-२, नौतडी घर भई हाल धनगढी बस्दै आएका अनिरुद्र जोशीलाई आर्थिक सहयोग हस्तान्तरण गरिएको छ।
केही महिनाअघि सवारी दुर्घटनामा परी गम्भीर घाइते भएका जोशीको कमजोर आर्थिक अवस्थालाई मध्यनजर गर्दै सञ्चालन गरिएको सहयोग अभियानबाट संकलित रकम आज हस्तान्तरण गरिएको हो।
अभियानका संयोजक एवं समाजसेवी सिद्धराज पनेरुले अभियानमार्फत संकलित जम्मा २ लाख २९ हजार ६ सय १६ रुपैयाँ आज जोशीलाई हस्तान्तरण गरेका हुन्।
अभियानमा १२० जनाले व्यक्तिगत रूपमा र १७ जनाले कोरियाबाट सामुहिक रुपमा सहयोग गरेको पनेरूले बताएका छन्।
सहयोग हस्तान्तरण गर्दै पनेरुले अभियानमा साथ दिने सम्पूर्ण सहयोगी मनहरूलाई धन्यवाद ज्ञापन गरे। उनले आगामी दिनमा पनि यस्ता मानवीय कार्यहरूमा सबैको साथ र सहयोगको अपेक्षा राखेको बताए।
समाजसेवी पनेरु यसअघि पनि विभिन्न सामाजिक र धार्मिक कार्यहरूमा सक्रिय रहँदै आएका छन्। उनले डडेल्धुराको भागेश्वर २ रुपालमा रहेको अशिग्राम माविका लागि साउण्ड सिस्टम खरिद अभियान, वडा नम्बर २ कै अशिग्राम मन्दिरका लागि आवश्यक सामाग्री खरिद अभियान, खिटकेश्वर मन्दिरमा बसाहा (नन्दी) स्थापना अभियान र कैलपाल मन्दिर परशुराम ३ थापलाका लागि आवश्यक सामाग्री सहयोग अभियान सञ्चालन गरेका थिए।
