धनगढी –बालअधिकार र बाल संरक्षण प्रवर्द्धन गर्ने उद्देश्यले सेफ द चिल्ड्रेनको सहयोगमा र विकासका लागि युवा ऐक्यबद्धता (यार्ड) को सहजीकरणामा सञ्चालित सहयात्रा परियोजना अन्तर्गत धनगढी उपमहानगरपालिकाका चार वडामा विशेष कार्यक्रम सम्पन्न गरिएको छ।
विगत १० महिनादेखि सञ्चालनमा रहेको यस परियोजनाले वडा नम्बर २, ११, १२ र १४ का एक सय १८ जना बालबालिकालाई लक्षित गरी संरक्षणका दृष्टिले अति जोखिममा परेका बालबालिकाहरूलाई आवश्यक शैक्षिक सामग्री वितरण गरेको हो। वितरण गरिएका सामग्रीमा विद्यालय पोशाक, झोला, कापी, कलम लगायतका सामग्रीहरू समावेश छन्।
बालबालिका सम्बन्धी ऐन २०७५ को दफा ४८ (१) बमोजिम, जोखिममा रहेका बालबालिकाको पहिचान वडास्तरीय बाल अधिकार समितिको सहयोगमा गरिएको थियो। समितिले वडा भित्रका बालबालिकाहरूको तथ्याङ्क सङ्कलन गरी यथार्थमा सामग्रीको खाँचो भएका बालबालिकाहरूको सिफारिस गरी सहयोग प्रक्रिया अगाडि बढाएको हो।
परियोजनाले बालबालिकामा अन्तर्निहित क्षमता विकास, आत्मविश्वास अभिवृद्धि तथा उनीहरूलाई आफ्नै अधिकारका पक्षमा सशक्त रूपमा उभ्याउने वातावरण निर्माणमा समेत जोड दिएको छ।
कार्यक्रम विद्यालयका बाल क्लब, समुदायका अभिभावक, स्वयम् बालबालिका र स्थानीय सरकारबीचको सहकार्यमा गरिएको छ। कार्यक्रमले स्थानीयस्तरमा बालअधिकारको सवालमा सहकार्य र संवेदनशीलता अभिवृद्धिमा योगदान दिएको कार्यक्रमकी फिल्ड अधिकृत सुमिता खड्काको भनाइ रहेको छ।
