काठमाण्डौ –सेवा र विकासका लागि युवाको स्थापना वि.सं. २०७५ फाल्गुन १५ गते जिल्ला प्रशासन कार्यालय चितवनमा दर्ता एवम् विधिवत् पञ्जिकरण भएको सामाजिक संस्था हो।
समाज जीवनका विभिन्न क्षेत्रमा कार्य गरिरहेका स्वयंसेवी भावका युवाहरू एवम् देशका विभिन्न क्षेत्र र तहमा रहेका युवालाई आवद्ध गर्दै समाजमा असल, कुशल, चरित्रवान, इमानदार र राष्ट्रिय दृष्टिकोणयुक्त युवावर्ग निर्माण गर्दै उनिहरूको सोच, क्षमता र कौशललाई समाजहित सेवामूलक एवम् विकास कार्यमा सदुपयोग गर्न र युवाशक्तिलाई विकासका विभिन्न कार्यमा सक्रिय गराउने ध्येयका साथ सेवा र विकासका लागि युवाको स्थापना भएको हो ।
जसले आफ्नो स्थापनाकालदेखी नै निरन्तर रूपमा सेवामूलक गतिविधिका साथै सीप विकास केन्द्र सञ्चालनमार्फत् नेपालका युवाहरूलाई निरन्तर सेवा एवम् समाजहितको कार्यमा प्रेरित गरिरहेको छ।
हालसम्म सेवा र विकासका लागि युवामार्फत धादिङ जिल्लाको चेपाङ बस्तीमा आर्थिक सहयोगका साथै लत्ता कपडा वितरण कार्यक्रम, बारा जिल्लामा हावाहुरी प्रभावित क्षेत्रमा खाद्यान्नका साथै जिन्सि सामग्रीको वितरण कार्यक्रम, लमजुङ, चितवन, पर्वत, दाङ लगायतका जिल्लाहरूमा वृहत् शैक्षिक सामग्री वितरण कार्यक्रम, जाजरकोटमा गएको भुकम्प पश्चात भुकम्पबाट प्रभावित बारेकोटको एक विद्यालयमा ओरेगन नेपाली समाज अमेरिकाको आर्थिक सहयोगमा ५०० जना विद्यार्थीलाई शैक्षिक सामग्री वितरण, निशूल्क कम्प्युटर प्रशिक्षण, कपडा बैंक सञ्चालन, विभिन्न शैक्षिक सामाजिक समसामयिक विषयमा विचारगोष्ठी, अन्तरक्रिया, जीवनउपयोगी सीपमूलक तालिम, सरसफाइ अभियान लगायतका कार्यक्रमहरू विभिन्न समयमा भइरहेको छ।
सेवा र विकासका लागि युवाले आफ्नो सेवाकार्य अन्तर्गत यस वर्षपनि विद्यार्थीहरूमाझ शैक्षिक सामग्री वितरण कार्यक्रम-२०८२ सुरु गर्ने भएको छ। यस वर्ष विद्यार्थीहरूको आवश्यकतालाई महशुस गरी अलग अलग १३ वटा जिल्लाका कक्षा ८ देखी १२ सम्म अध्ययनरत २५ सय जना विद्यार्थीलाई शैक्षिक सामग्री वितरण गरिने छ । जसमा गुरुकुल र गुम्बामा अध्ययनरत विद्यार्थी पनि समावेश रहेका छन्। पाँचथर, उदयपुर, नुवाकोट, सप्तरी, रामेछाप, गुल्मी, अर्गाखाँची, रोल्पा, सुर्खेत, डोटी, बाँके, नवलपुर, तनहूं लगायतका १३ वटा जिल्लामा कक्षा ८ देखी १२ सम्म अध्ययनरत विद्यार्थीहरूलाई झोला, कपी, कलम, जमेक्ट्री बक्स, प्राज्ञिक अंगेजी बोलचाल पुस्तक, नेपाली वृहत शब्दकोश र क्याप लगायतका शैक्षिक सामग्री वितरण गरिने छ ।
उक्त शैक्षिक सामग्री नेपालको शैक्षिक विकासमा विभिन्न प्रकारका छात्रवृत्ति प्रदान गर्ने, क्याम्पस, विद्यालय तथा पुस्तकालयका शैक्षिक तथा प्रशासनिक भवन निर्माण, विद्यालय तथा क्याम्पसका लागि बस प्रदान जस्ता महत्वपूर्ण सहयोग गर्दै आएको मित्रराष्ट्र भारतले सेवा र विकासका लागि युवाको आग्रहलाई स्वीकार गरी भारत सरकारको सहयोगबाट प्राप्त भएको हो ।
विद्यार्थीहरूमा नै राष्ट्रको वर्तमान र भविष्य निहित हुने भएकाले विद्यार्थीहरूलाई आवश्यक सहयोग गर्नु तपाईं हामी सबैको दायित्व हो । सेवा र विकासका लागि युवाको यो सार्थक प्रयासमा यहाँहरू सबैको आवश्यक सहकार्य र समन्वय रहने छ भन्ने अपेक्षा गरेका छन ।
