धनगढीःकैलालीबाट एक महिलासहित ४ जना लागूऔषधसहित पक्राउ परेका छन्।
धनगढी उपमहानगरपालिका-२ त्रिनगर भन्सार कार्यालय नजिकबाट गोदावरी नगरपालिका–५ का १९ वर्षीय नवीन नेपालीसहित दुई जनालाई १३ ट्याब्लेट नाईट्राभेट र ४ क्याप्सुल स्पास नामक लागूऔषधसहित पक्राउ परेका छन्। उनीहरुले प्रयोग गरेको सुदूरपश्चिम प्रदेश ०१०११ प ५३५१ नम्बरको मोटरसाइकलसहित दुबै जनालाई जिल्ला प्रहरी कार्यालय कैलालीबाट खटिएको प्रहरी टोलीले नियन्त्रणमा लिएको छ।
यस्तै धनगढी उपमहानगरपालिका–२ त्रिनगर भन्सार कार्यालय नजिकबाट धनगढी उपमहानगरपालिका–७ मनेहरा बस्ने २४ वर्षीय सन्दीप चौधरीलाई ८५० मिलिग्राम लागू औषध खैरो हेरोइन जस्तो देखिने धुलो पदार्थसहित जिल्ला प्रहरी कार्यालय कैलालीबाट खटिएको प्रहरी टोलीले पक्राउ गरेको छ।
यसैगरी लागूऔषध चरेस विक्री वितरण भइरहेको गोप्य सूचनाको आधारमा खटिएको प्रहरी टोलीले लम्कीचुहा नगरपालिका–१० चुहाबाट ५० वर्षीया कमला रावतलाई पक्राउ गरेको छ। रावतले सञ्चालन गरेको पसलमा खानतलासी गर्दा ७ सय ग्राम लागूऔषध चरेस फेला पारी इलाका प्रहरी कार्यालय लम्कीबाट खटिएको प्रहरी टोलीले नियन्त्रणमा लिएको छ। यी चारै जनालाई मंगलवार नियन्त्रणमा लिई थप अनुसन्धान भईरहेको प्रहरीले जनाएको छ।
