धनगढी –कैलालीमा पछिल्लो समय बिरामीका लागि आवश्यक पर्ने रगत तथा रक्ततत्त्वको कमि हुँदै गएपछि विद्यार्थीहरुले रक्तदान कार्यक्रमको आयोजना गरेका छन् ।
धनगढीस्थित त्रिनगर माध्यामिक विद्यालयमा आमसञ्चार विषयमा अध्ययनरत विद्यार्थीहरुले पहिलोपटक रक्तदान कार्यक्रमको आयोजना गर्दै २१ पिन्ट रगत संकलन गरेका छन् ।
आज विद्यालय परिसरमा आयोजना गरिएको रक्तदान कार्यक्रममा २१ जना विद्यार्थीहरुले पहिलोपटक रक्तदान गरेको रक्तदान कार्यक्रम संयोजक कविता सार्कीले बताइन् । उनले ९ छात्रा र १२ छात्र गरि २१ जनाले जीवनमै पहिलोपटक रक्तदान गरेको सार्कीले बताइन् ।
प्रदेशमै सबैभन्दा बढीपटक रक्तदान गरेका स्वयमसेवी रक्तदाता दिपक उपाध्यायले विद्यार्थीहरुसङ्ग अन्तरक्रिया पछि विद्यार्थीहरु रगत दिन तयार भएको आमसञ्चार विषयका प्राध्यापक टेकेन्द्र देउवाले बताए ।
रक्तदान गर्दाका फाइदा र यसको महत्वको बारेमा रक्तसंचार केन्द्र धनगढीका प्रमुख धरणी पन्तले विद्यार्थीहरुलाई जानकारी गराएका थिए ।
रक्तदान कार्यक्रममा बोल्दै त्रिनगर माविका प्राचार्य भुपाल खड्काले विद्यार्थीहरुको रक्तदान कार्यप्रति प्रशंसा व्यक्त गर्दै आगामी दिनमा पनि रक्तदान कार्यक्रमलाई निरन्तरता दिन आग्रह गरेका छन् ।
