धनगढीः कैलालीमा लागूऔषधसहित पाँच जनालाई प्रहरीले नियन्त्रणमा लिएको छ।
टीकापुर नगरपालिका–२ विजयनगर स्थित भित्री सडक खण्डबाट लागूऔषध सेवन गरि रहेको अवस्थामा टीकापुर नगरपालिका–१ विजयनगर बस्ने २५ वर्षीय श्याम चौधरीसहित दुई जना पक्राउ परेका छन्। दुई जनालाई ४० मिलिग्राम लागू औषधसहित इलाका प्रहरी कार्यालय टीकापुरबाट खटिएको प्रहरी टोलीले नियन्त्रणमा लिएको हो।
गोदावरी नगरपालिका–१ भगतपुरबाट सोही ठाउँ बस्ने २९ वर्षीय बिरेन्द्र चौधरी २१० मिलिग्राम खैरो हेरोइनसहित पक्राउ परेका छन्। चौधरीलाई जिल्ला प्रहरी कार्यालय कैलाली र इलाका प्रहरी कार्यालय मालाखेती, कैलालीबाट संयुक्त खटिएको प्रहरी टोलीले नियन्त्रणमा लिएको छ।
धनगढी उपमहानगरपालिका–३ ब्यारेल नजिकबाट गोदावरी नगरपालिका ३ बस्ने ३४ वर्षीय दिपक चदारालाई ४२० मिलिग्राम खैरो हेरोइनसहित जिल्ला प्रहरी कार्यालय कैलालीबाट खटिएको प्रहरी टोलीले नियन्त्रणमा लिएको हो।
यसैगरी धनगढी उपमहानगरपालिका–४ बसपार्कबाट दार्चुलाको व्यास गाउँपालिका–६ खातीगाउँ बस्ने २६ वर्षीय रवीन्द्र सिंह भण्डारी पक्राउ परेका छन्। भण्डारीलाई १३० मिलिग्राम खैरो हेरोइनसहित अस्थायी प्रहरी पोष्ट बसपार्कबाट खटिएको प्रहरी टोलीले नियन्त्रणमा लिएको छ। यी पाँचै जनालाई शनिवार प्रहरीले नियन्त्रणमा लिई थप अनुसन्धान गरिरहेको छ।
