धनगढीःआजभोलि बैंक तथा वित्तीय कम्पनीहरुमा चेक अनादर अर्थात् चेक बाउन्सका घटना बढ्न थालेका छन्।
बैङ्किङ कसुरअन्तर्गत खातामा पर्याप्त रकम नभई पनि भुक्तानीका लागि चेक काट्ने र दिने घटना बढ्न थालेको हो। पछिल्लो समय चेक बाउन्सका मुद्दा लिएर न्यायिक केन्द्र धाउनेहरुको संख्या बढ्न थालेको छ। यस्तो समस्या कैलालीमा पनि बढ्न थालेको हो। जिल्ला अदालत कैलालीले सोमबारका लागि चेक अनादरमा पाँच वादीले १४ जना प्रतिवादी विरुद्ध दायर गरेको मुद्दाका लागि पेसी तोकेको छ।
२०७९ असोज ३० गते चेक अनादर मुद्दामा वादी राजकुमारी चौधरीले प्रतिवादी रामशरण चौधरीसति २ जना विरुद्ध दायर गरिएको मुद्दाको सोमबार पेसी तोकिएको छ। यस्तै राजकुमारी चौधरीले नै २०७९ कार्तिक २३ गते सोही मुद्दामा सुर्बनीदेवी चौधरीसहित २ जना विरुद्ध दायर गरिएको मुद्दाको पनि पेसी तोकिएको छ।
सोही वर्षको कार्तिक २५ गते राजकुमारीले थप २ जना विरुद्ध र २०७९ पौष १९ गते थप २ तथा सोही वर्षको माघ १० गते चेक अनादर विनिमय अधिकार पत्र ऐन २०३४ को दफा १०७ क अन्तर्गत राजकुमारीले रामशरण चौधरीसहित २ जना विरुद्ध दायर गरिएको मुद्दाको पेसी तोकिएको छ। यस्तै गत वर्षको फागुन १० गते दुगड ब्रदर्स एण्ड प्रालिले लालबहादुर विक विरुद्ध चेक अनादरमा दायर गरिएको मुद्दाको पेसी तोकिएको छ।
चेक अनादरमै भक्तबहादुर साउँदले जगतबहादुर पार्की विरुद्ध, श्याम विष्टले शान्तिदेवी चौधरी विरुद्ध र गजेन्द्रबहादुर भण्डारीले आशिष भण्डारी विरुद्ध दायर गरेको मुद्दाको पनि पेसी तोकिएको छ। बैङ्किङ तथा वित्तीय व्यवस्थाअनुसार विनिमय वा भुक्तानीका लागि सहज होस् भन्ने किसिमले जारी गरिएको भुक्तानी आदेशपत्र नै चेक हो।
यस्तो आदेश पत्र खातावालाले जोकोहीको नाममा जारी गर्न सक्छ र बैङ्कले पनि प्रक्रिया मिलेको खण्डमा भुक्तानी दिन सक्छ। तर यस्तो आदेशपत्र (चेक) बैङ्कबाट अनादर वा अस्वीकृत पनि हुन सक्छ। यदि खातावालाले काटेको चेक वित्तीय नियम वा चेकको नियमअनुसार मेल नखाएमा वा चेकमा आदेश गरेअनुसारको रकम नपुगेमा चेक अस्वीकृत हुनसक्छ। यसैलाई चेक बाउन्स भन्ने गरिन्छ।
