बैतडी –बैतडीमा बालविवाह अन्त्यका लागि सरोकारवालाहरुसंग अन्तरक्रिया गरिएको छ ।
दलित समाज विकास मञ्चले सञ्चालन गरिरहेको बालविवाह रोकथाम परियोजनाको आयोजनामा अन्तरक्रिया गरिएको हो ।
बालविवाहले समाजमा थुप्रै समस्याहरु निम्त्याइरहेको भएपनि यसको रोकथाम हुन नसकेकोमा सरोकारवालाहरुले जोड दिएका छन् । गरिबी, सामाजिक कुसंस्कार, चेतनाको अभाव लगायतका कारणले समाजमा बालविवाह भइरहेको बताइएको छ ।
बालविवाह कानुनी रुपमा दण्डनीय कार्य भएपनि लुकिछिपी समाजमा बालविवाह भइरहेको सरोकारवालाहरुको भनाइ छ ।
बालविवाहले पार्ने असरका बिषयमा बालबालिका र उनीहरुका अभिभावकहरुलाई जानकारी दिन सकिएमा बालविवाह रोकथाम गर्न सकिनेमा धेरैले जोड दिएका छन् ।
कतिपय ठाउँमा कानुनी सचेतनाको अभाव रहेकाले कानुनका बिषयमा समेत सबैलाई जानकारी गराउनुपर्ने अधिवक्ता हरिदत्त भट्टले बताए ।
दलित समाज विकास मञ्चले बालविवाह न्यूनीकरणका लागि विभिन्न ठाउँमा किशोरीकिशोरीहरुको सञ्जाल निर्माण गरेर काम गरिरहेको समाजकी अध्यक्ष सरस्वती नेपालीले बताइन् ।
