काठमाडौं – प्रतिनिधि सभाका सांसद एवं पूर्वाधान विकास समितिका सभापति दीपक बहादुर सिंहले हेटौँडा सामुदायिक आँखा अस्पताललाई नौ लाख ९९ हजार नौ सय ९९ रुपैयाँ हस्तान्तरण गरेका छन् ।
मकवानपुर निर्वाचन क्षेत्र नम्बर १ बाट निर्वाचित संघीय सांसद सिंहले मंगलबार आफ्नो एक वर्षको तलबमा तीन लाख ८७ हजार रुपैयाँ थप गरेर अस्पताललाई नौ लाख ९९ हजार नौ सय ९९ रुपैयाँ हस्तान्तरण गरेका हुन् ।
सांसद सिहंले उक्त सहयोग रकमको चेक तिलगंगा आँखा अस्पतालका कार्यकारी निर्देशक डाक्टर सन्दुक रुइत र अस्पतालका संरक्षक सिद्धिलाल श्रेष्ठलाई हस्तान्तरण गरे ।
सहयोग रकम हस्तान्तरण गर्दै सांसद सिंहले आफूले चुनावमा जनतामाझ गरेका वाचाको रुपमा पहिलो वर्षको तलब जनताका लागि हेटौँडा सामुदायिक आँखा अस्पताल मार्फत उपलब्ध गराउने घोषणा पूरा गरेको बताए ।
सहयोग रकमको चेक बुझ्दै तिलगंगा आँखा अस्पतालका कार्यकारी निर्देशक डा. रुइतले सांसद सिंहको सहयोगले आर्थिक अवस्था कमजोर भएका जनताले सेवा पाउने विश्वास दिलाए ।
