काठमाडौँ ।त्रिवि मैदान कीर्तिपुरमा नेपाल प्रिमियर लिग (एनपीएल)को रौनकता चुलिँदै गर्दा टोलीको लक्ष्य र नारालाई खेलाडीको प्रदर्शनले पनि साकार बनाई रहेको छ ।
‘मैदानमा तुफान सुदूरको सान’ यो एनपीएलका लागि सुदूरपश्चिम रोयल्सले तय गरेको नारा हो । सुदूरपश्चिमले नारा अनुसार नै आफ्नो प्रदर्शनलाई चुस्त बनाई रहेको छ । लिगको सुरुवाती दुई खेलमा लगातार जित निकालेको सुदूरपश्चिमले बिहीबार पनि बलियो र महँगो टोली काठमाडौँ गुर्खाजलाई लज्जास्पद हार चखायो । औसत ब्याटिङ गरेको सुदूरपश्चिमले बलिङमा भने बेजोड प्रदर्शन गरेको थियो ।
सुदूरपश्चिमलाई जितको हकदार बनाउने काम नेपाली यु–१९ राष्ट्रिय टोलीका स्पिनर नरेन साउदले गरे । बुधबार मात्र संयुक्त अरब इमिरेट्स (युएई)मा भएको एसिसी यु–१९ एसिया कप खेलेर फर्कनु भएका नरेनले बिहीबार एक्लै पाँच विकेट चड्काएपछि उनी वाहवाहीको पात्र बनेका हुन् ।
नरेनले ३.५ ओभर बलिङ गर्दै १९ रन खर्चिएर पाँच विकेट लिए । १८ वर्षीय नरेन जारी लिगको एउटै खेलमा पाँच विकेट लिने पहिलो नेपाली बलर हुन् । यसअघि चितवनका सोहेल तनवीरले काठमाडौँविरुद्ध नै एक्लै पाँच विकेट लिएका थिए । पाकिस्तानका ३९ वर्षीय पेस बलर सोहेलले पाँच विकेट लिने क्रममा चार ओभर पुरै बलिङ गर्दै २१ रन खर्चिएका थिए ।
‘‘राति देखिनै मैले राम्रो खेल्दै प्येयर अफ दि म्याच बन्छु भन्ने सोचेको थिए । आज सोचे अनुसार खेल्न सकेँ । ठुला र नाम चलेका खेलाडीको बिचमा पहिलो खेलमै यस्तो प्रदर्शन गर्न सकेकोमा धेरै खुसी छु । आज कप्तान दीपेन्द्र दाइले पनि मलाई राम्रो मोटिभेसन गरिराख्नुभएको थियो । हरेक बलमा बाउन्ड्री गएपनि केही छैन । तिमिले राम्रो बल फ्याँक्छौँ । हामीलाई विश्वास छ, तिमिले विकेट निकाल्छौँ भनेर सम्झाउनुभएको थियो,’’ खेलपछि नरेनले भने ।
एनपीएलमा नरेनको यो डेब्यु खेल हो। सुदूरपश्चिमका कप्तान दीपेन्द्रले पनि नरेन राम्रो बलर रहेको भन्दै उनको प्रदर्शनका खुसी व्यक्त गरे । बिहीबार काठमाडौँ गोर्खाजलाई ७३ रनले हराएको हो । लिगमा झनै लयमा जनकपुर बोल्ट्स देखिएको छ ।
लगातार तीन खेल जित्दै शीर्षस्थानमा रहेको जनकपुरले बिहीबार पोखरा एभेन्जर्सलाई सात विकेटले हरायो । अनिल शाहको कप्तानीमा रहेको जनकपुर ब्याटिङ र बलिङ दुवैमा ‘ब्यालेन्स’ देखिएको छ । जनकपुरले आफ्नो पहिलो खेलमा विराटनगर किंग्सलाई र दोस्रो खेलमा कर्णाली याक्सलाई समान आठ विकेटले हराएको थियो । गोरखापत्रबाट
