धनगढी – वन तथा भू–संरक्षण विभागले नेपाल जैविक विविधता तथा रणनीति कार्ययोजनाले लक्षित गरे अनुसार लोपोन्मुख प्रजातिको सुचीमा परेका वनस्पति प्रजातिको संरक्षण गर्ने उद्देश्यका साथ सिमल कार्ययोजना २०८०–२०९० कार्यान्वयनमा ल्याएको छ।
नेपालमा सिमलको फैलावट तराईदेखि मध्य पहाडी भूभागसम्म रहेको पाइन्छ । आज वनस्पति अनुसन्धान केन्द्र कैलालीले स्व–स्थानीय संरक्षण गर्ने उद्देश्यका साथ देवहरिया वनस्पति उद्यान कैलालीको अम्लिडाडा क्षेत्रमा चार सय २१ गुणस्तरीय सिमलका बिरुवा रोपण गरि संरक्षणको सुरुवात गरेको छ।
विशाल रुख, चारैतिर फैलिएका हाँगाबिङ्गाहरू र ढकमक्क फुलेको आकर्षक फूल भएका कारण सिमललाई वृक्षको राजा पनि भन्ने गरिन्छ।
सिमलको वातावरणिय एवं जैविक विविधता संरक्षणमा महत्वपूर्ण भूमिका हुनुको साथै यसमा औषधिय गुणसमेत हुने वनस्पति अनुसन्धान केन्द्र कैलालीका प्रमुख गंगादत्त भट्टले बताएका छन्।
