काठमाडौँ । पशुपतिनाथ मन्दिरमा आयोजित कोटिहोममा आचार्य कृष्ण दमाईंले पहिलो पटक दलित समुदायबाट पण्डित व्यासासनमा प्रवचन दिएका छन् ।
बैतडीका कृष्ण दमाईंले नेपाल संस्कृत विश्वविद्यालय विद्यापीठ बेलझुन्डी दाङबाट संस्कृत साहित्यमा आचार्य गरेका छन् । यसअघि उनी कञ्चनपुरको शारदा विद्यापीठबाट संस्कृत विषयमा उत्तरमध्यमा र शास्त्री उत्तीर्ण भएका थिए ।
उनले प्रवचन दिने क्रमको सुरुवातमा संस्कृत साहित्यलगायत अन्य कर्ममा समावेश गराउने आदरणीय गुरुहरूमा नमन गरेका थिए । उनले गुरु ईश्वरदत्त भट्टलाई सधैँ सम्झिरहने र गुरुले शारदा विद्यापीठ महेन्द्रनगरको संस्कृत विद्याश्रममा पठाएको सम्झिएका थिए । उनले भने, “कतिपय मानिसले यो दमाईंको छोराले संस्कृत पढेर हाम्रो कर्मकाण्ड गर्ने हो र भन्थे । मैले कर्मकाण्डका लागि होइन, आफ्नो विद्वताका लागि, आफ्नो सनातनका लागि, जन्मभूमिका लागि यो विषय अध्ययन गरेको हुँ ।”
व्यासबाट उनले भने, “यस्तो पवित्र स्थलमा पुग्छु र बोल्छु भन्ने कल्पनै थिएन । हामीमा धार्मिक रूपले विध्वंस मच्चाई एकअर्कामा विभाजित गरी सनातनलाई सिध्याउने षड्यन्त्र भएको छ । अहिलेसम्म हिन्दु सनातनले सहँदै आएको छ । अब हामी हिन्दुत्वका लागि, सनातनका लागि एकबद्ध रहनु पर्छ ।” गाेरखापत्रबाट
