धनगढी –बुधबार बिहान भएको सौर्य एयरको जहाज दुर्घटनामा परेर घाइते भएका क्याप्टेन मनीषरत्न शाक्यको स्वास्थ्य अवस्था खतरामुक्त रहेको छ।
टाउको, आँखा, अनुहार र ढाडमा लागेको चोटपटकको शल्यक्रियापश्चात् उनको स्वास्थ्य अवस्था तत्कालका लागि खतरामुक्त रहेको काठमाडौं मेडिकल कलेज शिक्षण अस्पतालले जनाएको हो।
अस्पतालकी मेडिकल निर्देशक डा. मीना थापाका अनुसार शरीरका विभिन्न भागमा चोटपटक लागेकाले केही दिन चिकित्सकको निगरानीमा राख्नुपर्नेछ।
उनको ढाड र मस्तिष्कमा समेत चोटका कारण सुन्निएको छ। थप उपचारका लागि केही समय लाग्छ। अहिलेका लागि कम्तीमा ४८ घण्टा न्युरो आइसियूमा अब्जर्बेसनमा राख्छौँ, डा. थापाले भनिन्।
टाउको र ढाडको चोटका कारणसमेत पछि समस्या देखिन सक्ने भएकाले उनलाई अब्जर्बेसनमा राख्न लागिएको अस्पतालले जनाएको हो।
शरीरका विभिन्न भागमा चोटपटक लागे पनि जलन भने नभएका कारण अवस्था सामान्य रहेको चिकित्सकले बताएका हुन्।
दुर्घटनामा परेर मृत्यु भएकामध्ये अन्य १८ जनाको त्रिवि शिक्षण अस्पतालमा पोस्टमार्टम भइरहेको छ।
मृतकहरूको पोस्टमार्टम बुधबार साँझदेखि सुरु गरिएको हो। तर, सबै पोस्टमार्टमको रिपोर्ट आउन कम्तीमा तीन दिन लाग्ने अस्पतालले जनाएको छ।
