काठमाण्डौँ : जिल्ला हुलाक कार्यालय, बाराका तत्कालीन कार्यालय प्रमुख सहित ६ जनाविरुद्ध पाँच करोडभन्दा बढी रकम हिनामिना गरेको आरोपसहित अदालतमा मुद्दा दायर भएको छ।
अख्तियार दुरुपयोग अनुसन्धान आयोगले तत्कालीन कार्यालय प्रमुख जयलाल प्रसाद साह कानू सहित ६ जनाविरुद्ध आज विशेष अदालत काठमाण्डौंमा आरोपपत्र दायर गरेको हो।
कार्यालयका ना.सु. (हाल कार्यालय प्रमुख समेत) रहेका बलीराम प्रसाद कुर्मीले २०६० सालदेखि नै बचत बैंकको जिम्मा लिँदै आएको, बचतकर्ताको रकम कुनै अभिलेख नराखी अपचलन गरेको भन्दै जिल्ला अदालत बारामा मुद्दा दायर भई पुर्पक्षका लागि थुनामा रहेको उजुरी परेको थियो।
अनुसन्धानका क्रममा बलीराम प्रसादले तत्कालीन कार्यालय प्रमुखहरूसँगको मिलेमतोमा बचतकर्ताको बचत गर्नुपर्ने रकम आपसमा बाँडफाँड गरेको पाइएको अख्तियारको दाबी छ। बचतकर्ताबाट उठेको बचत रकम साँवा ब्याज गरी ५ करोड ३५ लाख ६४ हजार रुपैयाँ भन्दा बढी रकम हिनामिना गरेको देखिएको अख्तियारले उल्लेख गरेको छ।
अख्तियारका प्रवक्ता राजेन्द्रकुमार पौडेलका अनुसार उनीसँगै जिल्ला हुलाक कार्यालय, बाराका तत्कालीन कार्यालय प्रमुखहरू जयलाल प्रसाद साह कानू, अदालतप्रसाद कुर्मी, बुन्नीप्रसाद यादव, सुरेन्द्रप्रसाद यादव र सुजितकुमार साह विरुद्ध पनि भ्रष्टाचारको आरोपपत्र दायर गरिएको छ।
उनीहरुले हुलाक बचत बैंकको समेत कार्यालय प्रमुखको जिम्मेवारीमा रहँदा फाँटवाला बलीराम प्रसादसँग मिलेर बचतकर्ताको रकम दुरुपयोग गरी मासेको देखिएको अख्तियारको दाबी छ।
उनीहरूविरुद्ध ५ करोड ३५ लाख ६४ हजार २७९ रुपैयाँ बिगो कायम गरी कैद र जरिवाना माग दाबी सहित आज विशेष अदालत, काठमाण्डौँमा आरोपपत्र दायर गरिएको प्रवक्ता पौडेलले जानकारी दिएका छन्।
