धनगढी –धनगढीको कैलाली मोडेल माध्यमिक विद्यालयमा छात्राहरुलाई लक्षित गरी गरीएको २ दिने आत्मरक्षा तालिम सम्पन्न भएको छ।
विद्यालयकै प्राङ्गणमा सम्पन्न उक्त तालिममा कक्षा ६ देखि १० सम्मका ६० जना छात्राहरूले सहभागिता जनाएका थिए।
छात्राहरूलाई आत्मनिर्भर र आत्मविश्वासी बनाउने उद्देश्यले सञ्चालन गरिएको तालिममा तेक्वान्दो डोजाङ्ग प्रमुख पृथ्वीराज घिमिरेले प्रशिक्षण दिएका छन्।
विद्यालयका प्राचार्य तपेन्द्रबहादुर सिंहका अनुसार, पछिल्लो समय समाजमा बढ्दै गइरहेका सामाजिक विकृति तथा हिंसाले महिलाहरू विशेष रूपमा प्रभावित भइरहेकाले, यस्ता सीपमूलक तालिम अत्यावश्यक बनेका छन्। उनले विद्यालयले समय–समयमा यस्ता कार्यक्रमहरू सञ्चालन गर्दै आएको र आगामी दिनमा अझ प्रभावकारी रूपमा यस्ता तालिमलाई निरन्तरता दिने प्रतिबद्धता व्यक्त गरे।
उक्त तालिममार्फत छात्राहरूले आफूलाई संकटको अवस्थामा कसरी सुरक्षित राख्ने भन्ने महत्वपूर्ण ज्ञान तथा सीप प्राप्त गरेका छन्।
