काठमाण्डौं – खो–खो विश्वकपमा आज क्वार्टरफाइनलका खेल हुँदैछन् ।
भारतको नयाँ दिल्लीमा रहेको इन्दिरा गान्धी इन्डोर स्टेडियममा भइरहेको विश्वकप प्रतियोगिताको महिला पुरुष दुवैतर्फका क्वाटरफाइनल खेल आज हुन लागेको हो ।
महिलातर्फको खेल नेपाली समयअनुसार आज बिहान पौने ११ बजे शुरू हुनेछ । यसअघि नेपाली महिला टोली समूह विजेता बन्दै क्वाटरफाइनलमा पुग्न सफल भएको हो । समूह ‘सी’ को अन्तिम खेलमा नेपालले हिजो बङ्गलादेशलाई ८२–२४ ले हराएको थियो ।
समूह ‘सी’ मा रहेका भुटान र जर्मनी र श्रीलङ्का पनि नेपालसँग पराजित भएका थिए । समूह विजेता बनेको नेपालले चार खेलबाट १२ अङ्क जोडेको छ । बङ्गलादेश पनि नौ अङ्कसहित समूह उपविजेता बनेर क्वार्टरफाइनलमा पुग्न सफल भएको छ ।
पहिलो खो–खो विश्वकपमा नेपालबाट महिला र पुरुष दुवै टोलीले सहभागिता जनाएका छन् । पुरुषतर्फको क्वाटरफाइनल खेल पनि आजै दिउँसो १२ बजेपछि शुरू हुनेछ । प्रतियोगितामा भोलि शनिवार सेमिफाइनलको खेल हुनेछ भने पर्सि आइतवार फाइनल खेल हुनेछ ।
