ललितपुर । ललितपुर सातदोबाटोमा एक किशोरको हत्या भएको छ ।
ललितपुर सातदोबाटो बस्ने सुनसरी इटहरी घर भएका २३ वर्षीय नयन गुरुङको हत्या भएको प्रहरीले जनाएको छ ।
गुरुङको हत्या अभियोगमा ललितपुर महानगरपालिका–९ च्यासलस्थित टाउन अफ क्याफेका कामदार डडेलधुरा घर भई ललितपुर महानगरपालिका–९ च्यासल बस्ने २६ वर्षीय हेमराज भट्टलाई सोमबार राति प्रहरीले पक्राउ गरेको छ ।
साथै क्याफेका सञ्चालक र क्याफेका कुकलाई प्रहरीले नियन्त्रणमा लिएको छ । सञ्चालक र क्याफेका कुकलाई थप अनुसन्धानका लागि नियन्त्रणमा लिइएको हो ।
भट्टले सोही क्याफेमा आएका नयनलाई विवादको क्रममा चक्कु प्रहार गरेका थिए । चक्कु प्रहारबाट गम्भीर घाइते भएका नयन उपचारका क्रममा बिएन्डबी अस्पताल ग्वार्कोमा मृत्यु भएको प्रहरीले जनाएको छ ।
उनको उपचारको क्रममा मृत्यु भएको भन्ने खबर प्राप्त हुनासाथ प्रहरी प्रभाग बालकुमारी र जिल्ला प्रहरी परिसर ललितपुरबाट खटिएको प्रहरीले भट्टलाई पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको छ ।
