डोटी —आउँदो विजया दशमीको अवसरमा डोटी जिल्लाको बडिकेदार गाउँपालिका–०१, बि.पी. नगरमा प्रथम बडिकेदार गोल्ड कप खुल्ला फुटबल प्रतियोगिता हुने भएको छ।
एकता युवा क्लब बडिकेदार ०१ बि.पी. नगर, डोटीको आयोजनामा हुने प्रतियोगिता असोज ११ गतेदेखि १३ गतेसम्म केदार सूर्य बहुमुखी क्याम्पसको खेलमैदानमा सञ्चालन हुने आयोजकले जनाएको छ।
प्रतियोगितामा प्रथम हुने टिमलाई नगद ४० हजार रुपैयाँ, दोस्रो हुने टिमलाई नगद २० हजार रुपैयाँसहित मेडल, प्रमाणपत्र र ट्रफी प्रदान गरिनेछ। उत्कृष्ट खेलाडीलाई समेत विशेष सम्मानको व्यवस्था गरिएको छ।
प्रतियोगितामा सहभागी हुन चाहने टिमले असोज १ गतेदेखि असोज १० गतेसम्म ३,५०० रुपैयाँ शुल्क बुझाएर दर्ता गर्न सक्नेछन्। अनलाइनमार्फत इ–सेवाबाट पनि दर्ता गर्न सकिने व्यवस्था गरिएको आयोजक समितिका सदस्य शिशिर बोगटीले जानकारी दिएका छन्।
क्लबका सदस्य तिलक देउवाले भने, “स्थानियस्तरमा खेलाडीको प्रतिभा प्रदर्शन गर्ने र खेलप्रति युवाको आकर्षण बढाउने उद्देश्यले यसपटक गोल्ड कप फुटबल आयोजना गर्न लागिएको हो,” भनेर बताए।
